الشاعر الكبير أحمد الناصر الشايع رثاء ابنه محمد

[سيف الخوالد]

يا بعد نوم الليل عن حجـر عينـي=صبر على ما صار من وال الأقـدار

صبرت صبر بـاح منـه الكنينـي=أضحك مع العالم وكني علـى نـار

ما غير أهوجس بين نفسي وبينـي=يعلم بها العلام فـي كـل الأسـرار

تقل اتحـرى لـي علـوم تجينـي=مع الطروش اللي يجيبون الأخبـار

فهمت رأس العلـم مـن كلمتينـي=من يوم قالوا جـا محمـد ونصـار

تكسّـرت عقبـه جرايـد يميـنـي=عز الله اني عقب ما صـار صبّـار

من عقبهـا ونيـت لـي ونتينـي=ونة غريب بالخلا ضـاع واحتـار

لولا الله أبـرك ثـم قـوة يقينـي=لا طير مثل الطير من كـف صقـار

تخنقنـي العبـره وأفـرّك يدينـي=واحترت مثل مصالي النار والغـار

علـم يخلـي كـل قاسـي يلينـي=كنه على قلبي رصـاص أم كـرار

الـى ذكـرت عيالـه المصغرينـي=هــذا يعزيـهـم وهــذاك زوار

احد على جنبه واحـد لـه ونينـي=جتني هموم القلب من كل الأقطـار

قلت اصبروا والله مـع الصابرينـي=الله يكافيكـم صواديـف الأشـرار

عسى عوضنـا الحـي بالميتينـي=ناصر ونايف ذخرا سـر واجهـار

وأحمد وعبدالله ذرانـا الحصينـي=صغار سن وان بـدا الـلازم كبـار

يجبر عزاي اللي بخلقـه ضمينـي=محيي العروق الميته عقب الأمطار

مالي عن المكتوب فـوق الجبينـي=لو رحت شرق وغرب ويمين ويسار

صليت نصف الليل لـي ركعتينـي=أطلب لـه اللـي للخطيـات غفَّـار

خفف ذنوبه يا أرحـم الراحمينـي=في ماقفٍ ما ينفعن فيـه الأعـذار

جعله برضوانـك مـن الفايزينـي=بالماقف اللي به يضيعـن الافكـار

في ماقفٍ بـه كـل خافـي يبينـي=تمت وصلى الله على سيد الأبـرار

[هبس]

بارك الله فيك اخي سالم
والحقيقة ان الشاعر احمد الناصر من الشعراء الذين لا تمل سماع قصائدهم وبالأخص اذا كانت من القائه

[سيف الخوالد]

الله يبارك فيك يا بو محمد مشكور

[ابوماجد]

تمت وصلى الله على سيد الأبـرار
صح لسانك ياسالم

[سيف الخوالد]

مشكور يا بو ماجد الله يعطيك العافيه

[شـــــديد]

ياسلام عليك أبو على قصيده قمه في الروعه